بالی ووڈ سپراسٹار سلمان خان نے مصنوعی ذہانت کے ذریعے تیار کی جانے والی جعلی ویڈیوزبنانے والوں کے خلاف سخت کارروائی کرنے کا مطالبہ کردیا۔
بھارتی ٹی وی کے رئیلیٹی شو کی میزبانی کے دوران اداکار سلمان خان نے انکشاف کیا کہ وہ خود بھی اے آئی سے تیار کردہ جعلی ویڈیوز کا نشانہ بن چکے ہیں۔موجودہ دور میں ٹیکنالوجی اتنی ترقی کرچکی ہے کہ کسی کی آواز کو کلون کرنے یا ویڈیو میں اس طرح تبدیلی کرنے کی صلاحیت پیدا ہوگئی ہے کہ اصل اور جعلی مواد میں فرق کرنا مشکل ہوجاتا ہے۔ کسی شخص کی کہی ہوئی بات کو تبدیل کرکے اس کے منہ سے گالی تک دلوائی جاسکتی ہے۔
سلمان خان کا مزید کہنا تھا کہ جعلی ویڈیوز بنانے والے افراد کو سلاخوں کے پیچھے بھیجا جانا چاہیے۔ جب تک ایک آدھ شخص کو جیل نہیں بھیجا جائے گا یہ سلسلہ رکنے والا نہیں۔ انہوں نے اس مسئلے سے نمٹنے کے لیے سخت قانون سازی اور سوشل میڈیا پر مؤثر سنسرشپ کی ضرورت پر بھی زور دیا۔