بھارتی آرمی چیف کا بیان اشتعال انگیز ہے آئی ایس پی آر

پاکستان فوج کے شعبہ تعلقاتِ عامہ (آئی ایس پی آر) نے بھارتی آرمی چیف جنرل اپیندرا دویویدی کے حالیہ بیان پر سخت ردعمل دیتے ہوئے اسے اشتعال انگیز، غیر ذمہ دارانہ اور خطے کے امن کے لیے خطرناک قرار دیا ہے۔ بھارتی آرمی چیف نے پاکستان کے حوالے سے سخت مؤقف اختیار کرتے ہوئے کہا تھا کہ اسلام آباد کو فیصلہ کرنا ہوگا کہ وہ “جغرافیہ کا حصہ رہنا چاہتا ہے ۔

آئی ایس پی آر کی جانب سے جاری بیان میں کہا گیا کہ اس نوعیت کے بیانات غرور، جنگی سوچ اور خطرناک ذہنیت کی عکاسی کرتے ہیں، جو جنوبی ایشیا میں کشیدگی کو بڑھا سکتے ہیں۔ فوج کے ترجمان ادارے کے مطابق پاکستان ایک خودمختار، ذمہ دار اور ایٹمی ریاست ہے جسے خطے کی تاریخ اور جغرافیے سے الگ نہیں کیا جا سکتا۔

Jaw breaking response of DG ISPR to Indian Army Chief’s Bollywood dialogue 🔥💪🏻 pic.twitter.com/Ypx5Wza5jK

— Wajahat Kazmi (@KazmiWajahat) May 16, 2026

بیان میں کہا گیا کہ دہائیوں گزرنے کے باوجود بھارتی قیادت پاکستان کے وجود کو تسلیم کرنے میں ناکام رہی ہے جبکہ ماضی کے تجربات سے بھی سبق حاصل نہیں کیا گیا۔ آئی ایس پی آر نے مؤقف اختیار کیا کہ اس طرح کے بیانات خطے میں استحکام کے بجائے محاذ آرائی کو فروغ دیتے ہیں۔

فوج کے شعبہ تعلقاتِ عامہ نے مزید کہا کہ جنوبی ایشیا کو تصادم، دھمکی آمیز بیانات اور عسکری برتری کے بیانیے کے بجائے ذمہ دارانہ طرزِ عمل، سفارتی رابطوں اور پرامن بقائے باہمی کی ضرورت ہے۔