امریکا کے حملوں اور جوابی کارروائیوں کے بعد ایران نے آبنائے ہرمز بند کرنے کا اعلان کردیا جس کے بعد عالمی منڈی میں خام تیل کی قیمتوں میں اضافہ ہوگیا۔
غیر ملکی میڈیا کے مطابق سرمایہ کاروں نے خطے میں بڑھتی ہوئی کشیدگی اور توانائی کی ترسیل سے متعلق خدشات کے باعث تیل کی خریداری میں اضافہ کیا جس کے بعدعالمی منڈی میں خام تیل کی قیمتوں میں نمایاں اضافہ ہوگیا۔
رپورٹ کے مطابق برینٹ کروڈ آئل کی قیمت میں 2.30 ڈالر یا 2.47 فیصد اضافہ ریکارڈ کیا گیا جس کے بعد اس کی قیمت 95.40 ڈالر فی بیرل تک پہنچ گئی۔ امریکی ویسٹ ٹیکساس انٹرمیڈیٹ خام تیل کی قیمت میں 2.60 ڈالر یا 2.89 فیصد اضافہ ہوا اور یہ 92.63 ڈالر فی بیرل پر جا پہنچی۔
امریکی خام تیل کے فیوچر معاہدوں میں ابتدائی کاروبار کے دوران 3 ڈالر سے زائد کا اضافہ بھی دیکھا گیا، جو سرمایہ کاروں کے بڑھتے ہوئے خدشات کی عکاسی کرتا ہے۔