پاکستان میں غربت کی شرح میں اضافہ ہوا ہے اور ایک سال کے دوران 8 لاکھ شہری بیرون ملک چلے گئے۔
قومی اسمبلی میں وزیرخزانہ محمد اورنگزیب کی جانب سے پیش کیے گئے اقتصادی سروے کے مطابق ملک میں غربت کی شرح 28.9 فیصد تک پہنچ گئی ہے۔ گزشتہ مالی سال کے دوران روزگار کی تلاش میں 8 لاکھ پاکستانی ملک چھوڑ گئے۔
اقتصادی سروے کے اعداد و شمار کے مطابق شہری علاقوں میں غربت 11 فیصد سے بڑھ کر 17.4 فیصد اور دیہی علاقوں میں 28.2 فیصد سے بڑھ کر 36.2 فیصد ہو گئی ہے۔ قومی سطح پر تعلیم کی شرح 63 فیصد ریکارڈ کی گئی۔
اقتصادی سروے کے مطابق بلوچستان 47 فیصد شرح کے ساتھ ملک کا سب سے غریب صوبہ ہے جبکہ خیبر پختونخوا 35.3 فیصد کے ساتھ دوسرے، سندھ 32.6 فیصد کے ساتھ تیسرے اور پنجاب 23.3 فیصد کے ساتھ چوتھے نمبر پر ہے۔