کراچی: سندھ کے وزیر بلدیات ناصر حسین شاہ نے سوشل میڈیا پر گردش کرنے والی قیاس آرائیوں کے بعد ایک ویڈیو بیان جاری کرتے ہوئے کہا ہے کہ وہ بالکل خیریت سے ہیں اور اس وقت متحدہ عرب امارات کے شہر ابوظہبی میں موجود ہیں۔
ناصر حسین شاہ نے اپنے ویڈیو پیغام میں کہا، “الحمدللہ میں بالکل ٹھیک ہوں، میری صحت کے حوالے سے پھیلائی جانے والی خبروں میں کوئی صداقت نہیں۔” انہوں نے بتایا کہ وہ چار سے پانچ روز قبل نجی دورے پر ابوظہبی آئے تھے اور یہاں اپنی مصروفیات میں مصروف ہیں۔
انہوں نے عوام، دوستوں اور پارٹی کارکنوں کا شکریہ ادا کرتے ہوئے کہا کہ ان کی خیریت دریافت کرنے والے تمام افراد کی محبت اور دعاؤں کے لیے وہ ممنون ہیں۔ ان کا کہنا تھا کہ سوشل میڈیا پر غیر مصدقہ معلومات پھیلانے سے گریز کیا جائے اور کسی بھی خبر پر یقین کرنے سے پہلے اس کی تصدیق ضرور کر لی جائے۔
وزیر بلدیات نے کہا کہ وہ جلد پاکستان واپس آئیں گے اور اپنی سرکاری ذمہ داریاں معمول کے مطابق انجام دیں گے۔ انہوں نے عوام سے اپیل کی کہ افواہوں پر کان نہ دھریں اور صرف مستند ذرائع سے جاری ہونے والی معلومات پر اعتماد کریں۔
ناصر حسین شاہ کے ویڈیو بیان کے بعد ان کی صحت اور خیریت سے متعلق گردش کرنے والی افواہوں کی تردید ہو گئی، جبکہ پاکستان پیپلز پارٹی کے کارکنوں اور مختلف سیاسی شخصیات نے بھی ان کی خیریت پر اطمینان کا اظہار کیا۔