امریکی صدر ڈونلڈ ٹرمپ نے دعویٰ کیا ہے کہ امریکی بحریہ نے آبنائے ہرمز میں ایران کی بچھائی گئی بارودی سرنگوں کو مکمل طور پر ہٹا دیا ہے اور اب اس پر امریکا کا مکمل کنٹرول ہے۔
صدر ٹرمپ نے اوول آفس میں صحافیوں سے گفتگو کرتے ہوئے کہا کہ آبنائے ہرمز اب کھلا ہے اور اس وقت اس پر صرف امریکی بحریہ کا کنٹرول ہے۔ ایران کبھی کبھار آبنائے میں بارودی سرنگیں بچھا دیتی ہے تاہم امریکی بحریہ انہیں تلاش کرکے صاف کردیتی ہے۔ امریکی بحریہ نے پورے آبنائے ہرمز کو بارودی سرنگوں سے پاک کردیا ہے۔
امریکی صدر نے یہ دعویٰ بھی کیا کہ امریکا کو آبنائے ہرمز پر 100 فیصد کنٹرول حاصل ہوچکا ہے اور کسی بھی حصے میں ایران کی کوئی عمل داری نہیں ہے۔ آبنائے ہرمز خلیج فارس کو خلیج عمان اور بحیرہ عرب سے ملانے والی دنیا کی اہم ترین سمندری گزرگاہوں میں شمار ہوتی ہے۔