سابق کپتان راشد لطیف نے ٹیسٹ ٹیم کے ہیڈ کوچ سرفراز احمد اور بولنگ کوچ عمر گل کو ہٹائے جانے پر عاقب جاوید کو آڑے ہاتھوں لے لیا۔
سماجی رابطے کی ویب سائٹ ایکس پر راشد لطیف نے عاقب جاوید کا ایک بیان شیئر کیا جس میں وہ کہہ رہے ہیں کہ ہم نے کپتان کو کچھ مخصوص پلیئرز کو ڈراپ کرنے کے لیے کئی بار پیغامات بھیجے لیکن ہمارے پیغام پر عمل نہیں ہوا جس کے بعد یہ فیصلہ کیا گیا۔
راشد لطیف نے تنقید کرتے ہوئے سوال اٹھایا کہ اگر ٹیم کو ’ریموٹ کنٹرول‘ کے ذریعے چلانا تھا تو سرفراز احمد اور عمر گل کو ٹیم کے ساتھ کیوں بھیجا گیا؟انہوں نے مزید سوال کیا کہ گیری کرسٹن اور جیسن گلیسپی سے سلیکشن کے اختیارات واپس لینے کی ضرورت کیوں پیش آئی؟
راشد لطیف نے مزید کہا کہ اگر کپتان بابر اعظم ٹیم انتظامیہ کی ہدایات پر عمل نہیں کر رہے تھے تو انہیں کپتانی سے ہٹایا جائے۔ سرفراز احمد اور عمر گل کو واپس بھیجنے کی وجہ کیا تھی؟انہوں نے یہ سوال بھی اٹھایا کہ کیا اگلا نشانہ اب کپتان بابر اعظم بننے والے ہیں؟