بھارت کی خاتون یو ٹیوبر کو سوشل میڈیا پر اپنی دولت کی نمائش نے کروڑ روپے کے سونے اور ہیرے کے زیورات سے محروم کردیا۔
بھارتی میڈیا کے مطابق ریاست تامل ناڈو میں معروف یوٹیوبر مدھومیتا کے گھر سے تقریباً ایک کروڑ روپے مالیت کے سونے و ہیرے کے زیورات اور نقدی چوری کر لی گئی۔ خاتون یوٹیوبر مدھومیتا اپنے شوہر ونود کمار اور ایک بچے کے ساتھ گھر میں رہائش پذیر ہیں جہاں واردات کی گئی۔
ابتدائی تحقیقات کے مطابق ملزمان نے خاتون کی اپنی ہی ویڈیوز اور آن لائن سرگرمیوں سے حاصل معلومات کو استعمال کرتے ہوئے واردات کی منصوبہ بندی کی۔چوروں نے یوٹیوبر کے سوشل میڈیا پر ’میں کہاں رہتی ہوں‘ جیسے سوالات کے جوابات سے لوکیشن حاصل کی۔متاثرہ جوڑا جیولری اور کیش کے ہمراہ ویڈیوز سوشل میڈیا پر پوسٹ کرتا تھا۔
پولیس کا کہنا ہے کہ واردات کے روز مدھومیتا اپنے اہلِخانہ کے ہمراہ کپڑوں کی خریداری کے لیے گھر سے باہر گئی تھیں، اس دوران نامعلوم چور گھر کے پچھلے دروازے کو کاٹ کر اندر داخل ہوئے۔ واردات کے دوران چور یوٹیوبر کے گھر سے 81 تولہ سونا اور لاکھوں روپے لے کر فرار ہو گئے۔